Anyar Katon, Yak Opo Kabare
Saben
PSK Bakal Nampa Pesangon Rp 5,05 Yuta
Manut
rancangane, papan pelanyahan Dolly sing ujaring ngakeh paling gedhe sa-Asia iki
bakal ditutup. Wali Kota Surabaya Tri Rismaharini mesthekake sadurunge sasi Juli
2014, panggonan’esek-esek’ kasebut kudu wis tutup.
Saiki wanita nomer siji ing Surabaya iku
lagi ngajokake anggaran menyang Kementerian Sosial (Kemensos) kanggo nganakake
rehabilisasi papan pelanyahan kasebut. Risma-paraban akrabe Tri Rismaharini-
mratelakake, saiki ing papan kono ana pekerja seks komersial (PSK) kehe wong
375 kang wis diitung kanggo program rehabilitasi kuwi.
Program rehabilitasi iki arupa
paweweh sangu lan ketrampilan sadurunge para PSK bali mulih menyang desane
utawa nglakoni usaha liyane. Nalika wis ora dadi PSK, dheweke kabeh bisa urip
saka ketrampilane kang diduweni. “Sadurunge Juli, Dolly kudu wis ditutup,”
tandhese Risma sabubare mbukak acara Sosialisasi Partisipasi Masyarakat dalam
Pengelolaan Anggaran ing gedhong Sawunggaling, Pemkot Surabaya, mentas iki.
Sadurunge, ana patang papan
pelanyahan kang wis kasil ditutup (PS 15, kaca 15/2014), ing antarane yaiku Klakahrejo,
Sememi, Morokrembangan, lan Dupak Bangunsari. Saiki mung kari Dolly lan Jarak
ing Kecamatan Sawahan kang isih ana.
Risma nambahake, ana sakehing
pepalang anggone arep nutup Dolly lan Jarak iki. Ana wae pehak tinamtu kang ngalang-alangi.
Emane, Risma wegah nyebutake pehak ngendi kang dikarepake. “Kejaba iku, cacahe
PSK kang cukup akeh ing Dolly lan Jarak uga ndadekake pepalang. Menawa sing
liya-liyane, iku merga cacahe sethithik. Mung 100 engga 300 PSK. Dene yen ing
Dolly iki ewonan cacahe,” jlentrehe Risma saja judheg.
Sasuwene taun iki, pemerintah wis
nyepakake dhuwit luwih saka Rp 27 miliar kanggo rehabilitasi tilas laladan pelanyahan
ing Surabaya. Dhuwit iku digunakake kanggo patang titik tilas papan pelanyahan
kasebut.
Peprincene, kehe Rp 585 yuta saka
dana program Kementerian Sosial (Kemensos), Rp 25 miliar saka Pemerintah Kota
(Pemkot) Surabaya lan Rp 1,4 miliar maneh saka Pemerintah Provinsi Jawa Timur
(Jatim). “Ing rehabilitasi iki, pemkot ora mbongkar wisma sing sasuwene iki
digunakake kanggo papan kanggo maremake nepsu setan. Wisma iki kudu digunakake
kanggo omah umume,” ujare.
Gegayutan rasa kuwatire mlebune PSK
anyar menyang Dolly lan Jarak, Pemkot Surabaya sajak ora maelu. Sebabe, warga
ngenggon wis akeh kang nindakake kontrol marang wilayahe. Banjur, saka Pemkot
Surabaya wis ajeg nindakake Operasi Yustisi. Kalodhangane cilik banget ana PSK
anyar kang mlebu menyang papan pelanyahan iki. “Ya ora lah yen ana PSK anyar.
Apamaneh, warga ngenggon wis rumangsa enak lan kepenak karo kahanan saiki
(klawan anane penutupan Dolly lan Jarak),” tandhese.
Anggota Komisi D DPRD Surabaya,
Masduki Toha duwe anggepan, Pemkot Surabaya ora tumemen anggone nindakake
penutupan papan pelanyahan kasebut. Mesthine, sadurunge ditutup suk Juli.
Pemkot bisa aweh penjelasan tahapan marang para pedunung. Apa iku PSK apadene
mucikarine. Alane maneh, Pemkot ora nduwe data kang sah ngenani cacahe PSK lan
germo kang ana ing Dolly lan Jarak iki.
“Sing genah, Pemkot aja mung
munjerake marang PSK lan germo wae. Akibat sosial saka panutupan papan pelanyahan
iki uga kudu dipetungake. Perekonomian warga ngenggon bisa lumaku rancak merga
anane papan pelanyahan iki,” pangajape.
Sawatara iku, Ketua Komisi D DPRD
Surabaya Baktiono ngandhakake, kanggo penutupan Dolly lan Jarak, Pemkot kudu
nyangkutake perangan masyarakat utawa organisasi sosial supaya upayane iki
bisa kasil nganti tuntas temenan. Bab PSK kang diulihake menyang desane
dhewe-dhewe bisa tetep diawat-awati dening organisasi sosial kasebut.
“Banjur dana
kanggo germo lan PSK uga kudu diwenehake trep ing wayahe. Ora oleh diundur-undur,
apamaneh dipotong sethithika. Jalaran kabeh iki kanggo sangu bukak usahane
germo lan PSK sawise papan pelanyahane ditutup,” ujare. (Bsh)
Tidak ada komentar:
Posting Komentar